Cock’s-foot grass
Dactylis glomerata

A lintie o a lass rins uphill
tae the pasture field.
On the hip o the brae
the auld grey horse is lyin doon.

A worn-oot yaud
on his watch knowe,
his ee is far awa wi it,
lookin tae the heathery hills.

He’s waitin on the bairn
tae coorie in by his shouther.
She’ll pu a tait o grass for him,
the cock’s-foot he likes fine.

Thegither in companionrie,
the bairn beginnin
tae look ower the nest,
the grey horse beginnin

tae look aboot him
for a last circumspice,
they forgaither on the brae,
wide-warld waukin.